GEURAKAN ATJÈH MEURDÉHKA
Haba Peunjata
26 Maret 2021
Keu Bandum Bansa Atjèh Mulia Ateuëh Rhuëng Dônja,
Assalamu’alaikum warahmatullahi wabarakatuh
Bak uroenjoë, 26 Maret 2021, geunap 148 thôn njang ka u likôt, Keuradjeuën Beulanda djidjak Peunjata Prang ateuëh Keuradjeuën Atjèh deungon reusmi njang ka lheuëh meutjatat dalam seudjarah dônja lagèë njang kana bak dokumen seudjarah Neugara Beulanda dan surat2haba internasional ban sigôm dônja. Makanjan geutanjoë wadjéb ta peu-ingat seudjarah njang meugah lagèëna dan handjeuët tuwô sagai2 uroënjoë.
Teupeuingat seudjarah njang geutuléh deungon darahnjoe, nakeuh sibagoë teumpat dông peurdjuangan Geurakan Atjèh Meurdéhka njang teungoh ta sambôngnjoë sibagoë saboh bansa njang mulia, meurdéhka dan meudèëlat. Ta keunang keulai djasa2 éndatu dan sjuhada2 geutanjoë njang seutôt djeudjak langkah droë2neuhnjan.
Saboh2 bansa njang geuteupeuë seudjarah droëgeuh, akan teutap keumah hudép sibagoë bansa njang mulia, beumartabat dan sabé siap geusambông buët sutjinjoë njang ka geupeuleumah tjeuntoh lé éndatu geuh. Kheun awak Inggréh, History has a retroactive force. Seudjarah na keukuatan peuhudep keulai seumangat saboh2 bansa.
Ureuëng akan maté teutapi saboh2 bansa akan teutap hudép seulama bansa njan geuteupeuë seudjarah geuh. Djeuët geumadju dan geusurôt meunurôt watèë dan keuadaan.
Éndatu geutanjoë kôn sikada beuhô bak muprang, teutapi geutu’oh peugôt buët hubôngan luwa nanggroê joh gohlom muprang deungon Beulanda dan deungon dônja luwa. Njoë bandum na bukti dalam buku2 seudjarah njang ka meutuléh le awak luwananggroë dan meunantjit uléh Almarhum Paduka Njang Mulia Wali Neugara AtJéh, Tengku Tjhik di Tiro Hasan Muhammad, sibagoë dasar peurdjuangan njang ta sambông djinoë, bôh sitjara damé atawa sitjara muprang.
Uroënjoë ka 16 thôn ka ta meudamé tapi hasé njang ta harap hana meurata dan le njang hana djipeupunoh, malah djikhianat uléh Peumeurintah. Makanjan di geutanjoë ban mandum wadjéb saban2 ta muhasabah dan mita djalan njang seuneugôt-neugôtdjih deungon ta meusaboh droë dan peukông djama’ah dan ta meudo’a bak Po teuh Allah beuneupeuleumah djalan njang djroh bak ta peuseuleusoë buët2 njang goh seuleusoë deungon beumartabat.
Hana tuwo tjit saban2 ta meudo’a keu bandum sjuhada2 dari watèë éndatu dan keu sjuhada2 geutanjoë ban2njoë seulama 45 thôn peurdjuangan GAMnjoë. Al fatihah.
Wabillahitaufiq walhidajah wassalamu’alaikum warahmatullahi wabarakatuh.
Bakhtiar Abdullah
Djubir GAM
Stockholm, Swedia.
0 komentar:
Post a Comment