GEURAKAN ATJÈH MEURDÉHKA
Haba Peunja
3 Juni 2021
HAUL keu 11 Thôn Almarhum Paduka Njang Mulia, Wali Neugara Atjèh, Tengku Tjhik di Tiro Hasan Muhammad.
Keu bandum bansa Atjèh mulia ban sigom dônja,
Assalamu’alaikum warahmatullahi wabarakaatuh.
Bandum pudjoë meuwoe keu Po teuh Allah. Seulaweuët dan saleuëm njang lambông ta peu-ét keu Pang Ulèë geutanjoë, Nabi Muhammad Sallallahu ’alaihi wasallam beuseurta deungon ahli keuluarga dan sahabat2 droëneuhnjan.
Nibak uroënjoë, geunap 11 thôn Almarhum Paduka Wali Neugara Atjèh neutjôk pulang-neuwoë bak Po teuh Allah. Mudah2an dalam keuadaan husnul khatimah dan beuneupeuduëk sadjan aulia dan anbija.Beuneupeu-ampôn dèësja dan beuluwaih kubu. Hana tuwô tjit di geutanjoë saban2 ta peutrôk sikrèk Al fatihah keu droëneuhnjan beuseurta deungon bandum ulama2 njang ban neuwoë bak Allah chususdjih dan sjuhada2 njang laén. Al fatihah.
Almarhum Wali Neugara, njang ka geupeubleuët mata bansa Atjèh uroë, nakeuh sidroë manusia njang wadjèb ta ingat sabé2 ateuëh keuneubah dan amanah droëneuhnjan keu geutanjoë. Njakni hudép mulia – maté sjahid deumi keu agama, bansa dan dan Neugara Atjèh. Piké keu keupeunténgan bansa Atjèh sitjara kollektif, beu-échlaih dan lagèë meunurôt Al Quran dan Hadith, lagèë njang ka neupeudjak lé éndatu geutanjoë baroëdjéhkôn.
Èleumèë njan ka neupeudjaroë keu geutanjoë boh sitjara langsông atawa hana langsông. Meunantjit ka geutinggai kitab2 njang ka neukarang keu aneuk bansa. Malah na njang ka lheuëh meukeubah sitjara digital dan mantông na keuneubah hazanah seudjarah Atjèh diluwa nanggroë, meusipreuëk ban saboh dônja. Tinggai ta mita dan ta beuët kitab2njan keudroë-teuh dan teupeusampoë keu keuturônan (generasi) ukeuë mangat na soë sambông.
Droëneuhnjan, Alm. Wali Neugara, Tengku Tjhik di Tiro Hasan Muhammad, kôn sikada neuteumuléh buku malah neupimpin peurdjuangan bansa Atjèh sampoë akhé umu-neuh. Droëneuhnjan neutiëk dumpeuë keuseunangan hudép – keukajaan, keuluarga dan neuduëk, deungon neuhudép meusôsah-pajah lam glé. Lheuëhnjan neuhudép seudeurhana di luwananggroë dan neusambông buët peurdjuangan deungon neupeujakin masjarakat antarabansa peukara neuduëk legal peurdjuangan Atjèh njang goh seuleusoë. Malah dalam keuadaan sakét-neuh teutap teu-ingat keu nasib bansa dan neugara Atjèh.
Maka nibak uroë njang meuseudjarahnjoë di geutanjoë handjeuët han ta reunông keulai, keu peuë njang ka lheuëh neuamanah keu geutanjoë bansa Atjèh dan ta sambông ubèna daja ukeuë saban2 dalam saboh seuêh lagèë njang droëneuhnjan peubuët.
Wabillahi taufiq walhidajah wassalamu alaikum warahmatullaahiwabarakaatuh.
Njang échlaih,
Bakhtiar Abdullah
Djubir GAM
Stockholm, Swedia.
0 komentar:
Post a Comment