GEURAKAN ATJÈH MEURDÉHKA
Haba Peunjata
17 Mei 2021M-5 Sjawal 1442 H
Tragedi Peumbantaian Massa di Djambo Keupok, Keutjamatan Bakongan, Atjèh Tunong bak
17 Mei 2003.
Keu bandum bansa Atjèh mulia ateuëh rhuëng dônja
Assalamu’alaikum warahmatullahi wabarakaatuh
Bahpih geutanjoë mantông bak ta sambôt uroë keu-5 Uroë Raja Aidil Fitri 1442 Hidjrah, nibak uroënjoë saban2 ta peu-ingat tjit saboh keudjadian njang peuweuëh haté dalam seudjarah peurdjuangan Atjèh Meurdéhka dan bansa Atjèh.
Bak 17 Mei 2003, di Gampông Djambo Keupok, Bakôngan, Atjèh Tunong, kira2 poh 0700, dalam saboh operasi militer di gampongnjoë ka trôk lhèë boh truk reo TNI dan SGI, djidjak razia dan djipeusapat bandum ureuëng gampôngnjan. Kawasannjan ka djiduga sibagoë basis GAM. Lheuëhnjan, ka djisidëk-siasat deungon biadab lagèëna deungon tjara keukeurasan, sampoë’an teudjadi kureubeuën djawông, tjidra ureuëng dan rusak harta beunda.
Peuët droë ureuëng inong djipoh deungon teubuëng beudé dan djitimbak sampoë sjahid; 12 droë ureuëng agam lheuëh djiélanja djiguntji lam rumohnjan dan djitôt hudép2; 4 droë ureuëng inong lheuëh djiélanja djitimbak deungon beudé. Malah meunurôt saboh informasi njang ulôn teumeuëng watèë teudjak saweuë keunan bak thôn 2007, na padum2 droë ureuëng inông njang ka djipeurkosa lé awak TNI/SGI njoë.
Akibat nibak buët2 biadab TNI/SIG dan tindakan keukeurasan njang diluwa manusiawinjoë, ureuëng2 gampôngnjoë ka teupaksa meungungsi keu masdjid. Njang weuëh haté lom sampoë’an djinoë goh na meusidroë pih peulaku2 peulanggaran hak asasi manusianjoë njang na djisidék atawa djisidang dan djihukôm.
GAM meununtut supaja kasus2 peulanggaran hak asasi njang teudjad di Djambo Keupok dan di seuluruh Atjèh supaja djibri keudilan hukôm lé peumeurintah, lagèë patôt. Malah nakeuh keuwadjeban geutanjoë bansa Atjèh beuna peurhatian dan ta bantu kureubeuën2 njoë ubéna kuasa.
Deungôn ta peu-ingat tragedi Djambo Keupok njang teudjadi 18 thôn njang ka u likôt, ta meulakèë bak Po teuh Allah bèk meu-ulang keudjadian2njoë akan ukeuë dan sabé ta meudo’a seumoga Allah neupeuduëk kureubeuën2njoë sadjan sjuhada dan anbija deungon ta hadiah sikrèk Al Fatihah.
Wabillahi taufiq walhidajah wassalamu’alaikum warahmatullahi wabarakaatuh.
Bakhtiar Abdullah
Djubir GAM
Stockholm, Swedia
0 komentar:
Post a Comment