Peu-ingat Uroë Pembantaian Massa - Tragedi Simpang KKA, Aceh Utara 3 Mei 1999

 GEURAKAN ATJÈH MEURDÉHKA

Haba Peunjata

3 Mei 2021M/21 Ramadhan 1442 H

 

Peu-ingat Uroë Pembantaian Massa - Tragedi Simpang KKA, Aceh Utara 3 Mei 1999.

Keu bandum bansa Atjèh mulia ateuëh rhuëng dônja,

Assalamu’alaikum warahmatullahi wabarakatuh

Ramadhan mubarak! Ramadhan Karim! Alhamdulillah, seumoga dalam buleuën njang mulianjoë di geutanjoë sabé neubri lé Po teuh Allah, nikmat Iman, Islam dan sihat tubôh lahé-bathén bak ta peubuët ibadah puasa dalam buleuën sutjinjoë sampoë’an seuleusoë. Aaamiin.

Hana tuwô tjit nibak uroënjoë ta tamah do’a seumoga neuteurimông amal ibadah geutanjoë deungon ta meusadaqah  sikrek Al Fatihah keu bandum kureubeuën tragedi peumbantaian massa di Simpang KKA, Atjèh Utara, njang peusajat haté, uroënjoë 22 thôn njang ka u likôt. Al Fatihah. Seumoga Allah Subhanahuwa Ta’ala neupeuduëk kureubeuën2njoë sadjan Anbija dan sjuhada. Aamiin.

Nakeuh saboh keuwadjiban geutanjoë, bansa Atjèh, bak ta reunông keulai dan ta peu-ingat tragedinjoë. Uléh TNI, kôn djipoh maté mantong teutapi ka djiélanja sjèëdara2 geutanjoë deungon biadab lagèëna .  

Meunurôt saboh sumber na seukitar 46 kureubeuën sjahid  rakyat sipil, 156 droë luka tembak, dan 10 droë gadoh dalam peristiwa njan. Tudjoh droë nibak kureubeuën njang sjahid nakeuh aneuk miët. Keudjadiannjoë nakeuh saboh nibak padum2 boh peulanggaran hak asasi manusia njang rajek2 di Atjèh njang goh seuleusoë di tangani lé Peumeurintah RI.

Tudjuan ta peu-ingat tragedinjoë nakeuh deungon meukeusud supaja bèk meu-ulang lé keudjadian2 njang lagèë2njoë di Atjèh akan ukeuë. 

Dilikôt nibaknjan geutanjoë GAM dan ahli warèh kureubeuën, ta tuntut hak dalam buët peulanggaran hak asasi manusia supaja pihak TNI, sibagoë peulaku njang meutanggôngdjaweuëb lam buët biadabnjan di adili lagèë patôt. Malah waréh kureubeuën wadjéb disantuni lé Peumeurintah lagèë patôt dan ureuëng2 njang ka gadoh beumupat.

Keudjadian seudjarah hitam di Atjèhnjoë, teutap akan ta ingat seulama keuadilan gohlom teudông. 

Keu bandum ahli warèh kureubeuën, sibagoë ureuëng njang teudzalimi beuneubri keukuatan Iman dan Islam lam hudép siuroë2 dang2 meuteumeuëng keuadilan njang patôt.

Wabillahitaufiq walhidajah Wassalamu ’alaikum warahmatullahi wabarakaatuh.

Bakhtiar Abdullah

Djubir GAM

Stockholm, Swedia