Assalamu'alaikum warahmatullahi wabarakatuh
GEURAKAN ATJÈH MEURDÉHKA
Haba Peunjata
Alhamdulillah bak uroënjoë, 15 Agusti 2021, geunap 16 thôn ta peu ingat uroë tèkèn damé antara GAM dan RI, di Helsinki, Finlandia njang di mediasi lé Crisis Management Initiative (CMI) dan duköng Uni Eropa (EU) Deungon geutèkèn Memoradum Understanding (MoU) atawa Keuseupakatan Bersama, maka ka meu-akhé konflik sinjata antar RI-GAM, deungon kureubeuën djawông bansaa Atjèh meuploh-ribèe.droë, harta beunda njang reuloh dan hantjo serta ramé sjèëdara2 geutanjoë njang hana mupat djeurat sampoë an djinoë.
Peureulèë ta peu-ingat uronjoë kareuna njan nakeuh saboh seudjarah dalam peurdjuangan GAM deungon beureukat do'a bansa Atjèh. Bahpih le diantara butir2 MoU njang ka djikhiamati lé RI geutanjoë teutap harus ta muhasabah keu droëteuh tjit dalam kurun watéë daménjoë. Geutanjoë ban2dum ka saban2 ta maklum peuë njang ka teudjadi di lapangan dan dalam tubuh droë-teuh seulamanjoë. Maka saban2 ta tjok iktibar, ta musjawarah mita solusi, ta peugôt keulai pat njang ka reuloh dan ta mita peuë njang ka gadôh Hana mumakna meunjo di geutanjoë sabé2 ta peusalah po njoë dan po djéh meunjo hana saban2 ta seumiké dan mita djalan njang djroh keu masa ukeuë Atjèh.
Beuneuteupeuë bahwa di geuh tanjoë GAM ka geupeudjak buët seusuai deungon geunaréh peurdjuangan, bahpih na diantara geutanjoë meubida peumahaman dalam hainjoë seulama 16 thônnjoë. Geutanjoë ka lheuëh ta tji ôsaha peukông, konsolidasi dan peudjak program2 keu keupeunténgan bansa Atjèh. Manusia meureuntjana, tapi Allah neukheundak laén. Bahpih meunan njoë nakeuh saboh peu-ingat keu geutanjoë mangat ta gisa keulai bak djalan njang neuridha lé Po teuh Allah. Maka, ta peusaboh haté dan nawaitu geutanjoë lagèë njang ka geuamanah lé Almarhum Paduka Wali Neugara Atjèh, Tengku Tjhik di Tiro Hasan Muhammad dan gisa bak meunumatnjan mangat ta peudong keulai harkat dan martabat bansa Atjèh mulia.
Mulai djinoë´, peuë lom ka djitamong Thôn Baro Hidjrah 1443, saban2 ta peukông Iman dan ta peutoë droëh bak Allah Subhanahuwa Ta'ala, seumoga neupeuampôn dèësja dan bri peutnjôk njang peupeungeuëh hatë dan neupeukông seumangat geutanjoë bandum bak ta peudjak buët sutji njang gohlom seuleusoë njoë
Hana tuwo tjit saban2 ta peusampoë do'a keu bandum sjuhada2 dan pimpinan GAM bak geubila harkat, martabat dan dèëlat bansa Atjèh, Al Fatihah.
Achirul kalam, saleuëm Ma'al Hidjrah 1443 dan Uroë MoU keu-16 thôn.
Wassalamu alaikum warahmatullahi wabarakatuh.
Njang échlaih,
Bakhtiar Abdullah
Djubir GAM dan
Angèëta Peurundéng GAM MoU Helsinki
Stockholm, Sweden
0 komentar:
Post a Comment