Gerakan Aceh Merdeka
Free Aceh Movement
Press Release
4 Disember 2020
MILAD GAM Njang keu-44 Thon
Bismillahirrahmaanirrahiim
Assalamu'alaikum warahmatullahi wabarakatuh
Alhamdulillah deungon izin Allah, geutanjoe ka ta teumeung meusapat bak ta peu.ingat MILAD GAM Keu-44 Thon, bak uroenjoe njang ka lheuëh ta liwati saban2 deungon peunoh liku-liku njang mumatjam bagoe dalam watee leubeh nibak duwa keuturonannjoe.
Tudjuan ta peu-ingat uroe rajeknjoe nakeuh mangat ta ingat keulai sjuhada - peumimpin2 dan rakan2 geutanjoë njang ka awai geuwoë u bak Po teuh Allah njang jakin keu buet sutjinjoê, Seumoga Allah Subhanahuwa Ta'ala beuneuteurimông bandum amai ibadah, beuneupeuampon deesja ureuengnjoe dan neupeuduëk sadjan aulia dan anbiya. Aamiin.
Bagi geutanjoë njang mantong hudép, Insja Allah akan ta sambong buetnjoe deungon peunoh tabah hate meunurot kadar keumampuan droeteuh maseng2. Adak ka habeh umu teuh maka amanahnjoe pajah ta peutren bak generasi ukeue deungon ta bri peundidekan Atjeh njang beutoi.
Seulajeue 44 thon peurdjuangan GAM njoe, le peue njang ka keudjadian dalam tuboh GAM keudroë dan meunantjit peurobahan politek donja internasional. Makanjan-keuh peureulee ta muhasabah keudroe sitjara bersama (collective), peue2 njang djroh dan njang hana djroh njang ka teudjadi supaja bek rhot bak uruek2 sot. Hana trok meukeusud meunjo di geutanjoe hana ta peukong droeteuh deungon ta meusaboh, lahe bathen, deungon ta meu'ah peumeu'ah meunjo na salah silap diantara sabe droeteuh seulama hana meulanggeh deungon geunareh peurdjuangan. Bahpih na bida peundapat dan pandangan tapi wadjeb geutanjoë musjawarah dan tjok peuneutoh njang bulat deumi keupeuntengan bansa Atjeh ukeue.
Uroenjoe ka leubeh nibak 15 thon njang ta teken dame deungon RI dalam Perdjandjian MoU Helsinki di Finlandia. Le diantara butir2 MoUnjan njang hana djipeudjak malah djikhianati. Nikmat dame dan keuseudjahteraan hana meurata njang ta rasa. Makanjan peureulee tjit ta renung keulai hainjoe sira ta tuntut didalam dan bak pihak internasional supaja pihak RI djipeupeunoh djandji njang ka djiseupakat dalam MoUnjoe. Keu bandum para pihak peumangku keubidjakan njang teulibat dalam prosesnjoe, saban2 ta meuseuon tanggongdjaweueb ta peuseuleusoe buet njang hana seuleusoenjoe. Meunantjit deungon doa restu bandum lapeh masjarakat dan bansa Atjeh ateueh rhueng donja bak ta peugisa keulai marwah, harkat dan martabat bansa Atjeh.
Mudah2an Allah neupuka pinto hate dan neubri peuntjok sabe keu geutanjoe bak djalan njang sulu bak ta sambong buet sutjinjoe bak ta peu-ek hareukat dan marwah bansa Atjeh keulai lagee endatu-teuh. Saleuem Uroe Milad GAM keu 44.
Nasrum Minallahi Wa fathun kariib - beunantu Allah ka toe.
Wabillahitaufiq walhidajah Wassalamu Alaikum warahmatullahi wabarakatuh.
Njang echlaih,
Bakhtiar Abdullah
Jubir GAM di Stockholm
Angeeta Djuru-rundeng GAM, Mou Helsinki.
0 komentar:
Post a Comment