4 Désèmbèr 1976 - 4 Désèmber 2015
Assalamu’alaikum warahmatullahi wabarakatuh
Alhamdulillah, deungon izin Po Teuh Allah, uroënjoë ka ta teumeuëng sambôt saban2, Uroë Ulangthôn GAM njang keu-39, ban sigom dônja deungn tjara maséng2 meunurôt teumpat dan keuadaan.
Ta sambôt uroë njang meuseudjarahnjoë, deungon meukeusud ta keunang keulai para sjuhada njang gugor seulama peurdjuangan konflik antara GAM dan RI njang meuakhé damé deungon Peurdjandjian MoU Helsinki 10 thôn njang ka u likôt.
Ta peu-ingat uroënjoë meusigo-sigo deungon ta meusapat dan meudo’a keu ureuëng2 njan dan kureubeuën2 konflik – angèëta keuluarga, sjèëdara2 njang toë, rakan2 - njang hana lé sadjan geutanjoë, seumoga Allah Neupeuampôn dèësja dan Neupeuluwaih kubu dan Neupeuduëk ureuëng2njan sadjan aulia dan para anbiya. Amin.
Hana tuwo tjit bak ta peu-ingat uroë rajeknjoë deungon ta peugôt muhasabah peurdjuangan GAM, bak tangiëng watèë njang ka u likôt dan peuë njang peureulèë ta peubuët mangat leubèh meuhasé lom akan ukeuë bak ta peu-ék marwah dan martabat bansa Atjèh.
Peurdjuangannjoë hana habéh dan seuleusoë èt damé njoë. Tapi njan nakeuh saboh peuneuphôn nibak buët njang leubèh rajek lom ukeuë.
Peudjeuët teukheun meunan? Njoë kareuna geutanjoë ka ta tamông dalam adjang peurdjuangan politék njang that kompleks njang peunoh deungon tjabaran dan rintangan njang rajek that. Meunjo muprang deuh ta kalon soë musoh dan lawan-teuh tapi dalam peurdjuangan politék – njang rôh dalam meunumat peurdjuangan GAM – salah2 ta peutimang akan hantjô dan meu-imbas ateuëh bansa-teuh, bansa Atjèh mulia.
Uroënjoë, geutanjoë GAM ka ta tjok komitmen deungon ta meudamé dan mantong ta mumat keu Peurdjandjian MoU Helsinki. Maka wadjéb ateuëh geutanjoë dan di pihak RI peupeunoh komitmennjoë saban2 deungon ta peurdjuangkan bandum asoë MoUnjan deungon strategi njang leubèh ta utamakan keu keupeunténgan dan keu keuseudjahteraan rakjat Atjèh nibak keupeunténgan pribadi dan keulompok droëteuh.
Meunjo baroëkon keumaih ta meudong deungon dukungan dan beunantu rakjat Atjèh, peuë lom watèë ka damé wadjéb geutanjoë ta peurdjuangkan butir2 MoUnjoë deumi keu rakjat. Makanjan, wadjéb ta ngui strategi dan langkah2 njang bidjaksana mangat butir2 MoUnjoë, bahpih meulèk bak djidjak tapi meu-untong keu rakjat. Sibagoë tjeunto, peukara bandira dalam konteks damè, njang sampoë’an djinoë mantong hana seuleusoë. Meunjo ta tém robah deungon mekanisme demokratis – deungon ta teurimong masokan dan aspirasi nibak rakjat Atjèh – isunjoë tuntas.
Akibat meu-larôt2 hainjoë, butir2 laén njang leubèh peunténg lagèë miseuë hai2 njang meunjangkôt deungon keuseudjahteraan dan ekonomi rakjat, KKR, HAM dan laén2 kureuëng fokus. Peuë lom dalam hai ta santuni aneuk-jatim, kureubeuën konflik dan kaum dhu’afa njang mantong hana meurata. Meunjo hai utamanjoë hana ta peudjak maka seulamanjan-keuh Atjèhnjoë hana meubeudoh dan madju bahpih keukajaan Atjèh meulimpah-ruah.
Buët njoë bandum hana meuhasé meunjo di kalangan geutanjoë keudroë - angèëta GAM meutjré-bré dan ta meumusoh-musoh sabé2 keudroë leubèh nibak musoh éndatu. GAM wadjèb utoh dan solid sibagoe saboh organisasi politék njang mantong teudông dan djeuët keu taméng bansa Atjèh untok ta peudjuang keulandjutan MoUnjoë sampoë bandum butir2njoë teulaksana deungon samporna. Peuluweuëng njoë na di keuë geutanjoë meunjo na ’itikeuëd njang djroh nibak droëteuh deungon ta ôsaha robah pola-piké deumi keumaslahatan Ummat Islam Atjèh. Peureulèë ta tjok langkah2 njang leubèh meusaneuët dan meu-atô deungon ta peutoë droë-teuh bak ulama dan umara seureuta tokoh2 GAM dan tokoh2masjarakat mangat ta mita peutunjok dan nasihat. Wawasan geutanjoë harus leubèh luwaih bak ta mita solusi dalam hainjan.
Geutanjoë saban2 ta meulakèë do’a bak Allah, seumoga bandum ôsaha2 njoë meuteumeuëng bareukat dan hasé njang ta harap. Amin.
Wabillahitaufiq walhidajah wassalamu’alikum w.w.
Bakhtiar Abdullah
Koordinator GAM
Angèëta Peurundéng GAM MoU Helsinki, Finlandia.
0 komentar:
Post a Comment