GERAKAN ATJÈH MERDEKA
FREE ACEH MOVEMENT
Haba Peunjata
22 Januari 2021
Haul Asssjahid Tengku Abdullah Syafi’e, Panglima Prang Atjèh Meurdéhka
Njang keu 19 Thon
(22 Januari 2002 – 22 Januari 2021)
Keu bandum bansa Atjèh Mulia dan chususdjih keu rakan2 peudjuang GAM,
Assalamu’alaikum warahmatullahi wabarakatuh
Uroënjoë geunap 19 thôn njang ka ulikôt ta peu-ingat Asjsjahid Tengku Abdullah Sjafi’e, Panglima Prang Atjèh Meurdéhka, njang geumuprang deungon beuho dan sjahid di Djiëm-Djiëm, Pidië, meusigo deungon porumoh-neuh dan padum2 droë peudjuang-seutia Atjèh Meurdéhka.
Saban2 ta hadiah Alfatihah dan do’a ichlaih keu droëneuhnjan beuserta deungon sjuhada2 geutanjoë seumoga kureubeuën dan bandum amai ibadah droëneuhnjan beuserta deungon sjuhada2 geutanjoë beuneuridha uléh Allah Subhanahuwa Ta’ala, neupeuduëk droëneuhnjan sadjan Anbija dan sjuhada2, bak geubila harkat, martabat dan keumeurdehkaan Atjèh.
Peuë njang ka neukureubeuën lé droëneuhnjan dan sjèëdara2 geutanjoë nakeuh keu saboh tjita2 njang that mulia deumi agama, bansa dan Neugara Atjèh. Isj kariman wa musj sjahida – hudép mulia, maté beusjahid. Malah jôh gohlom sjahid-neuh na neukheun bahwa di droëneuhnjan hana neuharap sapeuë pih nibak hasé peurdjuangan dan beusjahid-neuh johgohlom meurdéhka. Tanda keuichlasan dan keudjudjuran gobnjan di dalam buët sutjinjoë njang that mulia.
Maka di geutanjoë njang mantông hudép, ka geutinggai saboh amanah lé droëneuhnjan bandum dan neujuë sambông buëtnjoë ladju sampoë trôk tjita2-teuh, dalam ranah dan tjara beurangkapeuë mantong bak ta peugisa keulai hareukat, martabat dan keumuliaan bansa Atjèh akan ukeuë.
Insja Allah, geutanjoë saban2 ta grak langkah, ajôn baho dan peusabôh droëteuh keu meukeusud dan tudjuannjoë, bak ta peudjak lagèë njang ka neupeuleumah rot-uëh lé Asjsjahid Tengku Abdullah Syafi’e dan rakan seupeurdjuangan geutanjoë njang ka gugur dalam mideuën prang.
”Wala taquulu limay yuqtalu fi sabiilillaahi am waatan. Bal ahyaa. Wala kin la tash ’uruun.” (Surat Al baqarah 154)
Dan bék ta kheun keu ureuëng2 njang gugur bak djalan Allah (bahwa ureuëngnjan maté), bahkan (sibeunadjih) ureuëng2njan hudép, teutapi gata hana ta sadari.
Wassalamu’alaikum warahmatullahi wabarakatuh.
Njang echlaih,
Bakhtiar Abdullah
Djubir GAM
0 komentar:
Post a Comment